സ്കൂൾ തസ്തിക നിർണയ നടപടികൾ വേഗത്തിൽപൂർത്തിയാക്കും: വി.ശിവൻകുട്ടി

തിരുവനന്തപുരം:2025-26 അക്കാദമിക വർഷത്തെ സ്കൂൾ തസ്തിക നിർണയ നടപടികൾ ജൂൺ 10മുതൽ ആരംഭിക്കും. ഇതിന്റെ ഭാഗമായി
ആറാം പ്രവർത്തി ദിനമായ 2025 ജൂൺ 10 ന് വാലിഡ് യു.ഐ.ഡി. ഉള്ള കുട്ടികളുടെ എണ്ണം, മറ്റു വിവരങ്ങൾ എന്നിവ സമ്പൂണയിൽ കൃത്യമായി രേഖപ്പെടുത്തുന്നതിനു എല്ലാ മാനേജർമാർക്കും, പ്രഥമാധ്യാപകർക്കും വിദ്യാഭ്യാസ അധികാരികൾക്കും നിർദേശം നൽകിയതായി മന്ത്രി വി.ശിവൻകുട്ടി അറിയിച്ചു.

2025 മെയ് 14 ലെ സർക്കുലർ പ്രകാരം നടപടികൾ വേഗത്തിലാക്കാൻ നിർദ്ദേശം നൽകിയിട്ടുണ്ട്. തസ്തിക നിർണയ നടപടികൾ
പൂർത്തിയാക്കുന്നതിന് ആവശ്യമായ നിർദ്ദേശം എല്ലാ അധികാരികൾക്കും നൽകുന്നതിനു വേണ്ട തുടർ നടപടികൾ ഡയറക്ടർ തലത്തിൽ
സ്വീകരിച്ചു വരുന്നു. 202-25 വർഷത്തെ തസ്തിക നിർണയം 2024 ജൂലൈ 15ന് പൂർത്തീകരിച്ച് തസ്തിക നിർണയ ഉത്തരവുകൾ ബന്ധപ്പെട്ട വിദ്യാഭ്യാസ ഓഫീസർമാർ പുറപ്പെടുവിച്ചിരുന്നു.
തുടർന്ന് എച്ച്.എസ്.ടി.(ഇംഗ്ലീഷ്)-നെ ഭാഷാ
വിഷയമായി കണക്കാക്കി, പിരീഡ് അടിസ്ഥാനത്തിൽ തസ്തിക നിർണയം നടത്തണമെന്ന ബഹുമാനപ്പെട്ട ഹൈക്കോടതിയുടെ വിധിന്യായം പാലിച്ചുകൊണ്ട് തസ്തിക നിർണയം നടത്തുന്നതിനു 2024 ഒക്‌ടോബർ 31 വരെ സർക്കാർ സമയം ദീർഘിപ്പിച്ചു നൽകുകയും, അതിന്റെ അടിസ്ഥാനത്തിൽ സംസ്ഥാനത്തെ
എല്ലാ സർക്കാർ/എയ്ഡഡ് സ്‌കൂളുകളിലും തസ്തിക നിർണയം പൂർത്തിയാക്കുകയും ചെയ്തിരുന്നു.

കെ.ഇ.ആർ അധ്യായം ഇരുപത്തി മൂന്ന് ചട്ടം 12-ൽ വരുത്തിയ ഭേദഗതിയുടെ അടിസ്ഥാനത്തിൽ, അധിക തസ്തികകളും ഡിവിഷനുകളും അനുവദിക്കേണ്ടത് സർക്കാർ തലത്തിൽ ആയതിനാൽ സംസ്ഥാനത്തെ അഞ്ഞൂറ്റി അമ്പത്തി രണ്ട് സർക്കാർ മേഖലയിലും അറുന്നൂറ്റി അമ്പത്തിയെട്ട് എയിഡഡ്
മേഖലയിലുമായി ആകെ ആയിരത്തി
ഇരുന്നൂറ്റി പത്ത് (1210) സ്‌കൂളുകളിൽ നിന്നും സർക്കാർ മേഖലയിൽ തൊള്ളായിരത്തി പതിനഞ്ചും എയിഡഡ് മേഖലയിൽ ആയിരത്തി മുന്നൂറ്റി നാലും ഉൾപ്പെടെ ആകെ രണ്ടായിരത്തി ഇരുന്നൂറ്റി പത്തൊമ്പത് (2219) അധിക തസ്തികകൾ അനുവദിക്കുന്നതിനു ആവശ്യമായ പ്രപ്പോസൽ ശിപാർശ സഹിതം പൊതു
വിദ്യാഭ്യാസ ഡയറക്ടറേറ്റിൽ നിന്നും സർക്കാരിലേക്ക് സമർപ്പിച്ചിരുന്നു.