തിരുവനന്തപുരം: പി.ജി.യും ബി.എഡും നേടിയവർക്ക് അധ്യാപകയോഗ്യതയ്ക്കായി പൊതുവിദ്യാഭ്യാസവകുപ്പ് ഏർപ്പെടുത്തുന്ന സ്റ്റേറ്റ് എലിജിബിലിറ്റി ടെസ്റ്റ് (സെറ്റ്) പരീക്ഷ എഴുതാനുള്ള അവസരം നഷ്ടപ്പെട്ട്ഉ ദ്യോഗാർത്ഥികൾ. കോവിഡ് വ്യാപനത്തെ തുടർന്ന് കഴിഞ്ഞ മാർച്ചിൽ മാറ്റിവെച്ച പരീക്ഷ ഇതുവരെയും നടത്താത്തതും സെപ്റ്റംബറിലെ പരീക്ഷ റദ്ദാക്കുകയും ചെയ്തതാണ് ഉദ്യോഗാർത്ഥികളെ വലച്ചത്.

തിരുവനന്തപുരത്തെ എൽ.ബി.എസ്. സെന്റർ ഫോർ സയൻസ് ആൻഡ് ടെക്നോളജിക്കാണ് പരീക്ഷാനടത്തിപ്പ് ചുമതല.
വർഷത്തിൽ രണ്ടു തവണ നടത്താറുള്ള സെറ്റിന്റെ ആദ്യഘട്ട പരീക്ഷയ്ക്ക് എല്ലാ ജില്ലാ ആസ്ഥാനങ്ങളിലും പരീക്ഷാകേന്ദ്രങ്ങൾ ഒരുക്കിയിരുന്നു. എന്നാൽ അടച്ചിടൽ വന്നതോടെ പരീക്ഷ മാറ്റിവെക്കുകയായിരുന്നു. പുതുക്കിയ തീയതി പിന്നീട് അറിയിക്കുമെന്ന് അധികൃതർ അറിയിച്ചെങ്കിലും തീയതി പ്രഖ്യാപിച്ചില്ല. ഇതോടെ അധ്യാപകജോലിയിൽ പ്രവേശിച്ച് നിശ്ചിത സമയപരിധിക്കകം സെറ്റ് യോഗ്യത നേടാൻ കാത്തിരിക്കുന്നവരും പ്രതിസന്ധിയിലായി.