നിർദ്ധന വിദ്യാർത്ഥികൾക്ക് ധനസഹായം: സ്‌നേഹപൂർവ്വം പദ്ധതിക്ക് ഡിസംബർ 15 വരെ സമയം

തിരുവനന്തപുരം: മാതാവോ പിതാവോ അല്ലെങ്കിൽ ഇരുവരും മരണമടഞ്ഞതും നിർദ്ധനരായവരുമായ കുടുംബങ്ങളിലെ വിദ്യാർത്ഥികൾക്ക് സ്നേഹപൂർവ്വം പദ്ധതിയിലേക്ക് അപേക്ഷിക്കാം. സർക്കാർ/ എയ്ഡഡ് വിദ്യാഭ്യാസ സ്ഥാപനങ്ങളിൽ ബിരുദം/ പ്രൊഫഷണൽ ബിരുദം വരെ പഠിക്കുന്ന വിദ്യാർത്ഥികൾക്കാണ് കേരള സാമൂഹ്യ സുരക്ഷാ മിഷൻ മുഖേന പ്രതിമാസ ധനസഹായ പദ്ധതിയായ സ്‌നേഹപൂർവ്വം നടപ്പാക്കുന്നത്. ഈ അദ്ധ്യയന വർഷത്തേക്കുള്ള അപേക്ഷകൾ, പഠിക്കുന്ന സ്ഥാപന മേധാവി മുഖേന ഡിസംബർ 15 വരെ സമർപ്പിക്കാം. സ്നേഹപൂർവ്വം പദ്ധതിയിലേക്ക് അപേക്ഷിക്കാനുള്ള സമയം ഈ മാസം അവസാനം വരെയാണ് നേരത്തെ അനുവദിച്ചിരുന്നത്. എന്നാൽ ഡിസംബർ 15വരെ സമയം നീട്ടിയിരിക്കുകയാണിപ്പോൾ. ആനുകൂല്യം ലഭിക്കുന്നതിന് നിലവിലുള്ള ഗുണഭോക്താക്കളും പുതിയ അപേക്ഷകരും പഠിക്കുന്ന വിദ്യാഭ്യാസ സ്ഥാപന മേധാവി മുഖേന അപേക്ഷകൾ ഓൺലൈനായി അപ്‌ലോഡ് ചെയ്യണം. സ്ഥാപന മേധാവികൾ മുഖേനയല്ലാതെ നേരിട്ടയക്കുന്ന അപേക്ഷകൾ ആനുകൂല്യത്തിനായി പരിഗണിക്കില്ല. കൂടുതൽ വിവരങ്ങൾക്ക്: www.kssm.ikm.in.