പ്രധാനമന്ത്രിയുടെ പിഎം കെയേഴ്സ് ഫണ്ടിലേക്ക് വിദ്യാഭ്യാസ സ്ഥാപനങ്ങളിൽ നിന്നും ലഭിച്ചത് 21.81 കോടി രൂപ

ന്യൂഡൽഹി: പ്രധാനമന്ത്രിയുടെ സിറ്റിസൺ അസ്സിസ്റ്റൻസ് ആൻഡ് റിലീഫ് ഇൻ എമർജൻസി സിറ്റുവേഷൻ ഫണ്ടിലേക്ക് (പിഎം കെയേഴ്സ് ഫണ്ട്) വിദ്യാഭ്യാസ സ്ഥാപനങ്ങൾ സംഭാവന ചെയ്‌തത്‌ 21.81 കോടി രൂപ. വിവിധ വിദ്യാഭ്യാസ സ്ഥാപനങ്ങൾ, അധ്യാപക, അനധ്യാപക ജീവനക്കാർ, വിദ്യാർത്ഥികൾ എന്നിവരാണ് പ്രധാനമന്ത്രിയുടെ ഫണ്ടിലേക്ക് സംഭാവന ചെയ്‌തത്‌. നവോദയ ജീവന സമിതി (എൻ.വി.എസ്), ജീവനക്കാരുടെ ശമ്പളത്തിൽ നിന്ന് മാത്രം നൽകിയത് 7.48 കോടി രൂപയാണ്. 11 കേന്ദ്ര സർവകലാശാലകൾ സംയുക്തമായി 3.39 കോടി രൂപ നൽകി. അലിഗഢ് മുസ്ലിം യൂണിവേഴ്സിറ്റി 1.22 കോടി രൂപയും ബനാറസ് ഹിന്ദു യൂണിവേഴ്സിറ്റി 1.14 കോടി രൂപയും, ഡൽഹി ആസ്ഥാനമായ സംസ്കൃത സർവകലാശാല 27.38 ലക്ഷവും സംഭാവന നൽകി. 20 ഐഐടികൾ ചേർന്ന് 5.47 കോടി സംഭാവനയായി നൽകി. ഐഐടി–ഖരഗ്പുർ ഒരു കോടി രൂപയും ഐഐടി–കാൺപൂർ 47.71 ലക്ഷവും നൽകി . 9എൻഐടികൾ സംയുക്തമായി 1.01 കോടി രൂപയും സംഭാവന ചെയ്തു. ഐഐഎം കോഴിക്കോടാണ് ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റുകളിൽ ഏറ്റവുമധികം തുക നൽകിയത് – 33.53 ലക്ഷം. 10 ഐഐഎമ്മുകളും ചേർന്ന് 66 ലക്ഷമാണ് സംഭാവന നൽകിയത്.

…