തിരുവനന്തപുരം:ഇന്ത്യൻ അഡ്മിനിസ്ട്രേറ്റിവ് സർവിസ് (ഐഎഎസ്), ഇന്ത്യൻപൊലീസ് സർവിസ് (ഐപിഎസ്), ഇന്ത്യൻ ഫോറിൻ സർവിസ് (ഐഎഫ്എസ്) അടക്കം രാജ്യത്തെ 23 ഉന്നത സർവിസുകളിലേക്കുള്ള ഉദ്യോഗസ്ഥരെ തിരഞ്ഞെടുക്കാനുള്ള 2025ലെ സിവിൽ സർവിസസ് പരീക്ഷക്ക് അപേക്ഷ ക്ഷണിച്ചു. ഇതിനുള്ള വിജ്ഞാപനം യൂണിയൻ പബ്ലിക് സർവിസ് കമീഷൻ http://upsc.gov.in.ൽ പ്രസിദ്ധീകരിച്ചു.
അംഗീകൃത സർവകലാശാലയിൽ നിന്നുള്ള ബിരുദമാണ് യോഗ്യത. മാർക്ക് നിബന്ധനയില്ല. അവസാനവർഷ ബിരുദ പരീക്ഷയെഴുതി ഫലം കാത്തിരിക്കുന്നവർക്കും അപേക്ഷ നൽകാം. എംബിബിഎസ്/ബിഡിഎസ്/വെറ്ററിനറി സയൻസ്/ബിഇ/ബിടെക് മുതലായ പ്രഫഷണൽ ബിരുദക്കാർക്കും അപേക്ഷ നൽകാം.
അപേക്ഷകർക്ക് 2015 ആഗസ്റ്റ് ഒന്നിന് 21വയസ് തികയണം. സംവരണ വിഭാഗങ്ങൾക്ക് വയസിൽ ഇളവുണ്ട്. 100 രൂപയാണ് അപേക്ഷ ഫീസ്. വനിതകൾ/എസ്.സി/എസ്.ടി/ഭിന്നശേഷിക്കാർക്ക് ഫീസില്ല. ഫെബ്രുവരി 11 വൈകീട്ട് ആറു വരെ ഒറ്റത്തവണ രജിസ്ട്രേഷൻ നടത്തി ഓൺലൈനായി അപേക്ഷിക്കാം. കൂടുതൽ വിവരങ്ങൾ വിജ്ഞാപനത്തിലുണ്ട്. https://upsconline.gov.in വഴി അപേക്ഷ നൽകാം. തെറ്റ് തിരുത്തുന്നതിനും മാറ്റങ്ങൾ വരുത്തുന്നതിനും ഫെബ്രുവരി 12 മുതൽ 18 വരെ സൗകര്യം ലഭിക്കും. സിവിൽ സർവിസസ് പരീക്ഷക്ക് രണ്ട് ഘട്ടമാണുള്ളത്. ആദ്യം പ്രിലിമിനറി പരീക്ഷ. ഇതിൽ യോഗ്യത നേടുന്നവർക്കാണ് രണ്ടാംഘട്ടമായ സിവിൽ സർവിസസ് (മെയിൻ) പരീക്ഷയെഴുതാൻ അർഹതുള്ളത്.
പ്രിലിമിനറിപരീക്ഷ 2025 മേയ് 25ന് തിരുവനന്തപുരം, കൊച്ചി, കോഴിക്കോട് അടക്കം രാജ്യത്തെ തെരഞ്ഞെടുക്കപ്പെട്ട 80 കേന്ദ്രങ്ങളിലായി നടത്തും. മെയിൻപരീക്ഷക്ക് കേരളത്തിൽ തിരുവനന്തപുരം മാത്രമായിരിക്കും കേന്ദ്രം. എഴുത്തുപരീക്ഷയും ഇന്റർവ്യൂവും അടങ്ങിയതാണ് മെയിൻ പരീക്ഷ. ഒബ്ജക്ടിവ് മാതൃകയിലുള്ള പ്രിലിമിനറി പരീക്ഷ ഫലം പ്രസിദ്ധപ്പെടുത്തി 10 ദിവസത്തിനകം യോഗ്യത നേടിയവർ 200 രൂപ ഫീസ് അടച്ച് കേഡർ മുൻഗണന അടക്കം മെയിൻ പരീക്ഷക്ക് വെബ്സൈറ്റിൽ രജിസ്റ്റർ ചെയ്യാം.
ഒരു അപേക്ഷകന് സിവിൽ സർവിസസ് എഴുതുന്നതിന് പരമാവധി 6അവസരമാണ് ലഭിക്കുക. പട്ടിക വിഭാഗക്കാർക്ക് പരീക്ഷ എഴുതുന്നതിന് പരിധിയില്ല. ഒബിസി, ഭിന്നശേഷി വിഭാഗങ്ങളിൽപെടുന്നവർക്ക് പരമാവധി 9 തവണ പരീക്ഷയെഴുതാം.
