പ്ലസ് വൺ പൊതുപരീക്ഷ: ഒരുക്കങ്ങൾ തുടങ്ങി

തിരുവനന്തപുരം: ഈ മാസം 6മുതൽ ആരംഭിക്കുന്ന പ്ലസ് വൺ പൊതുപരീക്ഷക്കുള്ള ഒരുക്കങ്ങൾ ആരംഭിച്ചു. പരീക്ഷയ്ക്ക് മുന്നോടിയായി സ്‌കൂളുകളിൽ ശുചീകരണ ജോലികൾ ആരംഭിച്ചു. ശുചീകരണ പ്രവർത്തനങ്ങളുടെ സംസ്ഥാനതല ഉദ്ഘാടനം തിരുവനന്തപുരം എസ്എംവി സ്കൂളിൽ ഇന്ന് രാവിലെ മന്ത്രി വി.ശിവൻകുട്ടി നിർവഹിച്ചു. മന്ത്രിയും ശുചീകരണ പ്രവർത്തിയിൽ ഏർപ്പെട്ടു.

നാളെയും മറ്റന്നാളും സംസ്ഥാനത്തെ എല്ലാ പരീക്ഷാ കേന്ദ്രങ്ങളിലും അണുനശീകരണ പ്രവർത്തനങ്ങൾ നടക്കും. രാഷ്ട്രീയ – സാമൂഹിക – സാംസ്കാരിക – സന്നദ്ധ സംഘടനകൾ ശുചീകരണ പ്രവർത്തനങ്ങളുടെ ഭാഗമാകും. എംഎൽഎമാരും തദ്ദേശ ഭരണ പ്രതിനിധികളും ഈ പ്രവർത്തനങ്ങൾക്ക് നേതൃത്വം നൽകും. സെപ്റ്റംബർ ആറ് മുതൽ 27 വരെയാണ് പ്ലസ് വൺ പരീക്ഷ നടക്കുന്നത്.