തേഞ്ഞിപ്പലം: അഖിലേന്ത്യാ അന്തർ സർവകലാശാലാ ഫുട്‌ബോൾ കിരീടം നേടിയതിന്റെ സുവർണജൂബിലി ആഘോഷത്തിലാണ് കാലിക്കറ്റ്‌ സർവകലാശാല. ആഘോഷപരിപാടികൾ നാളെ രാവിലെ 11ന് സർവകലാശാലാ സെനറ്റ് ഹാളിൽ നടക്കും. മുൻ താരങ്ങളെയും പരിശീലകരെയും ആദരിക്കുന്ന ചടങ്ങിന്റെ ഉദ്ഘാടനവും കായിക ഹോസ്റ്റലിന്റെ ശിലാസ്ഥാപനവും മന്ത്രി വി. അബ്ദുറഹ്മാൻ നിർവഹിക്കും. 1971-ൽ കാലിക്കറ്റ് ആതിഥ്യം വഹിച്ച ചാമ്പ്യൻഷിപ്പിലാണ് ആദ്യ അഖിലേന്ത്യാ കിരീടം കരസ്ഥമാക്കിയത്. ചടങ്ങിൽ പി. അബ്ദുൾ ഹമീദ് എം.എൽ.എ. മുഖ്യാതിഥിയാകും. വൈസ് ചാൻസലർ ഡോ. എം.കെ. ജയരാജ് അധ്യക്ഷത വഹിക്കും. മുൻ ക്യാപ്റ്റൻ വിക്ടർമഞ്ഞില ഉൾപ്പെടെയുള്ള താരങ്ങളും പരിശീലകൻ സി.പി.എം. ഉസ്മാൻ കോയ, പ്രഥമ കായിക ഡയറക്ടർ ഡോ. ഇ.ജെ. ജേക്കബ് തുടങ്ങിയവരും സിൻഡിക്കേറ്റംഗങ്ങളും പങ്കെടുക്കും.