തിരുവനന്തപുരം: ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ നിർധനരായ വിദ്യാർത്ഥികൾക്ക് നൽകുന്ന സ്കോളർഷിപ്പിന് ഇപ്പോൾ അപേക്ഷിക്കാം. സാമ്പത്തികമായി പിന്നാക്കാവസ്ഥയിലുള്ള വിഭാഗങ്ങളിലെ വിദ്യാർഥികൾക്ക് ഉന്നത പഠനത്തിനായാണ് സ്കോളർഷിപ്പ് നൽകുന്നത്. പ്രതിവർഷം 2ലക്ഷം രൂപയിൽ കവിയാത്ത വാർഷിക വരുമാനമുള്ള കുടുംബത്തിലെ വിദ്യാർത്ഥികളെയാണ് ഇതിനായി പരിഗണിക്കുക. ഓരോ വർഷവും 20,000 രൂപയുടെ സ്കോളർഷിപ്പാണ് അതത് കോഴ്സ് കാലയളവിൽ നൽകുക. എൽഐസിയുടെ ഗോൾഡൻ ജൂബിലി ഫൗണ്ടേഷനാണ് സ്കോളർഷിപ്പ് പദ്ധതി നടപ്പാക്കുന്നത്. എൽഐസിയുടെ ഓരോ ഡിവിഷനിലും 10 പെൺകുട്ടികൾ അടക്കം 20 പേർക്കാണ് സ്കോളർഷിപ്പ് അനുവദിക്കുക.
അംഗീകൃത കോളജുകളിൽ മെഡിക്കൽ, എൻജിനിയറിങ് കോഴ്സുകൾ പഠിക്കുന്നവർ, ഏതെങ്കിലും വിഷയത്തിലെ ബിരുദം/ ഇന്റഗ്രേറ്റഡ് പ്രോഗ്രാം/വൊക്കേഷണൽ പ്രോഗ്രാം, ഏതെങ്കിലും മേഖലയിലെ ഡിപ്ലോമ എന്നിവ പഠിക്കുന്നവർക്കായാണ് സ്കോളർഷിപ്പ് നൽകുന്നത്. 2019-20 ൽ പ്ലസ് ടു പരീക്ഷ 60 ശതമാനം മാർക്കിൽ വിജയിച്ച് 2020-21-ൽ മേല്പറഞ്ഞ കോഴ്സുകളിൽ പഠിക്കുന്നവരാകണം. 2019-20 അധ്യയന വർഷത്തിൽ എസ്എസ്എൽസി പരീക്ഷ 60 ശതമാനം മാർക്കോടെ വിജയിച്ച് 2020-21-ൽ ഇന്റർമീഡിയറ്റ്/പ്ലസ്ടു പഠിക്കുന്നവർക്ക് സ്പെഷ്യൽ ഗേൾ ചൈൽഡ് സ്കോളർഷിപ്പും നൽകും. ഓരോ എൽഐസി ഡിവിഷനിലും 10 പേർക്ക് ഇത് നൽകും. പ്രതിവർഷം10,000 രൂപ ലഭിക്കുന്ന ഗേൾ ചൈൽഡ് സ്കോളർഷിപ്പ് രണ്ടുവർഷം ലഭിക്കും. തുക മൂന്ന് ഗഡുക്കളായാണ് അനുവദിക്കുക. അർഹരായവർ www.licindia.inലെ ഗോൾഡൻ ജൂബിലി ഫൗണ്ടേഷൻ ലിങ്ക് വഴി അപേക്ഷിക്കണം. ഡിസംബർ 31ആണ് അപേക്ഷിക്കാനുള്ള അവസാന തിയതി.