കോഴിക്കോട്: കൊറോണ ഭീതിയിൽ വീട്ടിൽ ഇരിക്കുന്ന വിദ്യാർത്ഥികളുടെ ആശങ്കങ്ങൾ കോർത്തിണക്കി ഒരുകൂട്ടം അധ്യാപകർ ഒരുക്കിയ സംഗീത ആൽബമാണ് \’ശലഭങ്ങളായ് വരും\’.
\”വിദ്യാലയമേ എന്നിനി നിന്നുടെ മുറ്റത്തെത്താനാകും?…എന്ന് തുടങ്ങുന്ന വീഡിയോ ആൽബം വിദ്യാലയ ഓർമകളിൽ ആശങ്കകളോടെ വീട്ടിൽ ഇരിക്കുന്ന കുട്ടികളുടെ മനസാണ് തുറന്ന് കാട്ടുന്നത്. \”ചങ്ങാതികളുടെ വിരലു പിടിച്ചിട്ടെന്നിനി ഓടാനാകും…\” ആൽബത്തിന് മനോഹരമായ വരികൾ ഒരുക്കിയത് അധ്യാപകനും ഗാനരചയിതാവുമായ രമേശ് കാവിൽ ആണ്. സംഗീതം ഒരുക്കിയത് അധ്യാപകൻ കൂടിയായ സംഗീത് നിസ്വാർത്ഥ. തൃക്കടശ്ശേരി ജിയുപി സ്കൂളിലെ മൂന്നാം ക്ലാസ് വിദ്യാർത്ഥിനി നിരഞ്ജനയാണ് ഗാനം മനോഹരമായി പാടിയിരിക്കുന്നത്. ആൽബത്തിന്റെ പ്രകാശനം മന്ത്രി സി. രവീന്ദ്രനാഥ് നിർവഹിച്ചു. 8 ചിത്രകലാ അധ്യാപകർ വിവിധ സ്ഥലങ്ങളിൽ നിന്ന് വരച്ച ചിത്രങ്ങളാണ് ആൽബത്തിന് മികവുറ്റ കാഴ്ച ഒരുക്കുന്നത്. നാടകപ്രവർത്തകരായ ഒരുകൂട്ടം അധ്യാപകർ വിദ്യാർത്ഥികൾക്കായി ഒരുക്കിയ ലോക്ഡൗൺ സമ്മാനമാണ് ശലഭങ്ങളായ് വരും.
.