സംസ്ഥാന ടെക്നിക്കൽ സ്‌കൂള്‍ കായികമേളയുടെ വേദി കുറ്റിപ്പുറത്തല്ല: വേദിമാറ്റം സൗകര്യക്കുറവിനെ തുടർന്ന്

Getting your Trinity Audio player ready...

.
SUBSCRIBE OUR YOUTUBE CHANNEL https://youtube.com/c/SchoolVartha
JOIN OUR WHATSAPP GROUP  https://chat.whatsapp.com/DJyDol6Ntu898w1sWLREHb

മലപ്പുറം:ഈവർഷത്തെ സംസ്ഥാന ഗവ. ടെക്നിക്കൽ സ്കൂൾ കായികമേളയുടെ വേദി കുറ്റിപ്പുറത്തുനിന്ന് മാറ്റാൻ തീരുമാനം. ജനുവരി 11മുതൽ കുറ്റിപ്പുറം ഗവ.ടെക്നിക്കൽ ഹൈസ്കൂൾ മൈതാനത്ത് നടത്താൻ നിശ്ചയിച്ചിരുന്ന 38-ാമത് സംസ്ഥാന ടെക്നിക്കൽ സ്കൂൾ കായികമേളയാണ് മൈതാനത്തിന്റെ ശോച്യാവസ്ഥയെ തുടർന്ന് മാറ്റുന്നത്. ചതുപ്പ് നിലമായ മൈതാനത്ത് മഴയെ തുടർന്ന് മത്സരങ്ങൾ നടത്താൻ കഴിയില്ലെന്ന വിദഗ്ധസമിതി തീരുമാനത്തെ തുടർന്നാണ് വേദി മാറ്റാൻ നിർദ്ദേശം നൽകിയത്. സംസ്ഥാന കായികമേളയ്ക്ക് ഉതകുന്ന തരത്തിലല്ല കുറ്റിപ്പുറം ഗവൺമെന്റ് ടെക്നിക്കൽ സ്കൂളിലെ നിലവിലെ മൈതാനം. കായികമേള മലപ്പുറം ജില്ലയിലെ തന്നെ കാലിക്കറ്റ് യൂണിവേഴ്സിറ്റി സ്റ്റേഡിയത്തിലേക്ക് മാറ്റാനാണ് ആലോചന. ഇവിടെയുള്ള സിന്തറ്റിക് ട്രാക്കിൽ മത്സരങ്ങൾ നടത്തും. കഴിഞ്ഞദിവസം ചേർന്ന വിദഗ്ധ സമിതിയാണ് അന്തിമ തീരുമാനം കൈക്കൊണ്ടത്.

കുറ്റിപ്പുറം ടെക്നിക്കൽ സ്കൂളിൽ കായികമേളം നടത്തിപ്പുമായി ബന്ധപ്പെട്ട സംഘാടകസമിതി അടക്കം രൂപീകരിച്ചിരുന്നു. കായികമേളയുടെ ലോകപ്രകാശനവും ഇവിടെവച്ചാണ് നടത്തിയത്. കഴിഞ്ഞ ദിവസങ്ങളിൽ തുടർച്ചയായി മഴ പെയ്തതോടെ മൈതാനം മത്സരങ്ങൾക്ക് യോജ്യമല്ലാത്ത രീതിയിലേക്ക് മാറുകയായിരുന്നു. 39 ടെക്ക്‌നിക്കല്‍ സ്‌കൂളുകളിൽ നിന്നും ഒമ്പത് ഐ.എച്ച്.ആര്‍.ഡി കേന്ദ്രങ്ങളിൽ നിന്നുമായി ആയിരത്തിലേറെ കായിക താരങ്ങളാണ് ഈ വർഷത്തെ മേളയിൽ മാറ്റുരക്കുക. 12 വർഷങ്ങൾക്കു മുൻപ് കുറ്റിപ്പുറം ടെക്നിക്കൽ ഹൈസ്കൂളിൽ നടന്ന സംസ്ഥാന കായികമേളയ്ക്ക് ശേഷം ഈ മൈതാനം വിപുലീകരിക്കാൻ പദ്ധതി ഉണ്ടായിരുന്നു. അധികമായി 10 ലക്ഷം അനുവദിച്ച് നിർമ്മാണ ഉദ്ഘാടന നിർവഹിച്ചെങ്കിലും പദ്ധതി നടപ്പായില്ല. തുടർ പ്രവർത്തനങ്ങൾ ഒന്നുമില്ലാതെ മൈതാനം ശോച്യാവസ്ഥയിലാവുകയായിരുന്നു.