അധ്യാപകരെ കോവിഡ് ഡ്യൂട്ടിയിൽനിന്ന് ഒഴിവാക്കാൻ തീരുമാനം

തിരുവനന്തപുരം:സംസ്ഥാനത്ത് ഓൺലൈൻ ക്ലാസുകളും പ്ലസ് വൺ പരീക്ഷകളും പ്ലസ് വൺ പ്രവേശ നടപടികളും ഉള്ളതിനാൽ സ്കൂൾ അധ്യാപകരെ കോവിഡ് ഡ്യൂട്ടിയിൽനിന്ന് ഒഴിവാക്കാൻ തീരുമാനമായി. മുഖ്യമന്ത്രി വിളിച്ചുചേർത്ത കോവിഡ് അവലോകന യോഗത്തിലാണ് തീരുമാനം. ഇതനുസരിച്ച് ഇനിയുള്ള ദിവസങ്ങളിൽ കോവിഡ് ഡ്യുട്ടിയ്ക്കായി അധ്യാപകർ പോകേണ്ടിവരില്ല. പുതിയ അധ്യയന വർഷം ആരംഭിച്ചത് മുതൽ ഓൺലൈൻ ക്ലാസുകളുടെ തിരക്കിലാണ് അധ്യാപകർ.

ഇതിനു പുറമേ സ്കൂൾ പ്രവേശന നടപടികളും പൂർത്തിയാക്കാനുണ്ട്. പ്ലസ് വൺ പ്രവേശനത്തിനുള്ള നടപടികൾ ആണ് സംസ്ഥാനത്തെ സ്കൂളുകളിൽ ഇപ്പോൾ പുരോഗമിക്കുന്നത്. ഇതിനുപുറമേ പ്ലസ് വൺ പരീക്ഷയുടെ തിരക്കിലുമാണ് അധ്യാപകർ. വിക്ടേഴ്സ് ചാനലിൽ സംപ്രേക്ഷണം ചെയ്യുന്ന ഫസ്റ്റ് ക്ലാസിന് പുറമേ അധ്യാപകർ നേരിട്ടും ക്ലാസുകൾ നൽകുന്നുണ്ട്. ഇതിനിടെ കോവിഡ് ഡ്യൂട്ടി ഉണ്ടായാൽ അത് ക്ലാസുകളെ ബാധിക്കുമെന്ന് കണ്ടെത്തിയതിന് അടിസ്ഥാനത്തിലാണ് സംസ്ഥാന സർക്കാരിന്റെ പുതിയ തീരുമാനം.