കാലിക്കറ്റ് സർവകലാശാല ബിരുദഫലങ്ങൾ ഓണത്തിന് മുൻപ്

തേഞ്ഞപ്പലം:കാലിക്കറ്റ് സര്‍വകലാശാലയുടെ വിദൂരവിദ്യാഭ്യാസ വിഭാഗം ഉള്‍പ്പെടെയുള്ളവയുടെ ആറാം സെമസ്റ്റര്‍ ബിരുദ ഫലങ്ങള്‍ ഓണാവധിയ്ക്ക് മുൻപായി പ്രഖ്യാപിക്കും. ഇതിനുള്ള നടപടികൾ പുരോഗമിക്കുന്നതായി പരീക്ഷാ കണ്‍ട്രോളര്‍ അറിയിച്ചു. കോവിഡ് നിയന്ത്രണ സാഹചര്യങ്ങളിലും പരീക്ഷാ ഭവന്‍ ജീവനക്കാര്‍ ബിരുദഫല പ്രഖ്യാപനത്തിനായി അവധിയെടുക്കാതെ പരിശ്രമിക്കുകയാണ്.

ഓഗസ്റ്റ് 16-ന് തന്നെ ഫലം പ്രഖ്യാപിക്കാനാണ് ശ്രമം. 19-നാണ് അവധി തുടങ്ങുന്നത്. മൂല്യനിര്‍ണയം പൂര്‍ത്തീകരിച്ച ഉത്തരക്കടലാസുകളിലെ മാര്‍ക്കു വിവരങ്ങള്‍ ക്രോഡീകരിച്ച് അപ്‌ലോഡ് ചെയ്യുന്ന ജോലി പുരോഗമിക്കുകയാണ്. ജീവനക്കാരുടെ വിഷമങ്ങള്‍ ബ്രാഞ്ച് മേധാവികളില്‍ നിന്ന് നേരിട്ട് മനസിലാക്കിയ സിണ്ടിക്കേറ്റ് പരീക്ഷാ സ്ഥിരംസമിതി എല്ലാ പിന്തുണയും അറിയിച്ചിട്ടുണ്ടെന്നും പരീക്ഷാ കണ്‍ട്രോളര്‍ ഡോ. സി.സി. ബാബു അറിയിച്ചു.