ന്യൂഡൽഹി: ബി ആർക്ക് പ്രവേശനത്തിനായി നടത്തുന്ന  നാഷണൽ ആർക്കിടെക്ചർ (നാറ്റ) പ്രവേശന പരീക്ഷ  പൂർത്തിയാക്കാനായില്ലെന്ന് ഒരുകൂട്ടം വിദ്യാർത്ഥികൾ നാറ്റ സെല്ലിൽ പരാതി നൽകി. ഓൺലൈനായി നടത്തിയ പരീക്ഷയിലെ സാങ്കേതിക തടസങ്ങൾ മൂലം  വിദ്യാർത്ഥികൾക്ക് പരീക്ഷ പൂർത്തിയാക്കാനായില്ല. കഴിഞ്ഞശനിയാഴ്ചയാണ് പരീക്ഷ ഓൺലൈനായി സംഘടിപ്പിച്ചത്. കേരളത്തിൽ ആലപ്പുഴ, കണ്ണൂർ, കൊല്ലം, കോഴിക്കോട്, തൃശ്ശൂർ, എറണാകുളം, തിരുവനന്തപുരം, കോട്ടയം ജില്ലകളിലാണ് പരീക്ഷാകേന്ദ്രങ്ങൾ ഉണ്ടായിരുന്നത്.പല കേന്ദ്രങ്ങളിലും സാങ്കേതികതടസ്സങ്ങളുണ്ടായി. കോവിഡ് സാഹചര്യത്തിൽ കേന്ദ്രങ്ങളിലെത്താൻ കഴിയാത്തവർക്ക്   വീട്ടിലിരുന്നും പരീക്ഷയെഴുതാൻ സൗകര്യംചെയ്തിരുന്നു. കേരളത്തിൽ ഇങ്ങനെ വീടുകളിൽ പരീക്ഷയെഴുതിയവരാണ് കൂടുതലും ബുദ്ധിമുട്ടിലായത്. പരീക്ഷയുടെ ഫലം വ്യാഴാഴ്ച വരാനിരിക്കുകയാണ്. ഫല പ്രഖ്യാപനം നീട്ടിവെക്കണമെന്നും വിദ്യാർത്ഥികളിൽ നിന്നും ആവശ്യമുയരുന്നുണ്ട്.