കമ്പാര്‍ട്മെന്‍റ് പരീക്ഷാഫലം: ഒക്ടോബര്‍ ആദ്യവാരത്തോടെ പ്രഖ്യാപിക്കുമെന്ന് സി ബി എസ് സി

ന്യൂഡല്‍ഹി: സി.ബി.എസ്.ഇയുടെ 12-ാം ക്ലാസ് പരീക്ഷയില്‍ തോറ്റവര്‍ക്കും, ഫലം മെച്ചെപ്പെടുത്താന്‍ ആഗ്രഹിക്കുന്നവര്‍ക്കുമായി നടത്തുന്ന കമ്പാര്‍ട്മെന്‍റ് പരീക്ഷയുടെ ഫലം ഒക്ടോബര്‍ പത്തിനോ അതിന് മുമ്പോ പ്രഖ്യാപിക്കും.സുപ്രീംകോടതിയില്‍ ജസ്റ്റിസ് എഎം ഖാന്‍വില്‍ക്കര്‍ അധ്യക്ഷനായി ബെഞ്ചിന് മുമ്പാകെ സി ബി എസ് സി ആണ് ഇക്കാര്യം അറിയിച്ചത്.രണ്ട് ലക്ഷത്തോളം വിദ്യാര്‍ഥികള്‍ കമ്പാര്‍ട്മെന്‍റ് പരീക്ഷ എഴുതുന്നുവെന്നാണ് ഹര്‍ജിക്കാര്‍ സുപ്രീംകോടതിയെ അറിയിച്ചത്. ഈ വര്‍ഷത്തെ ഡിഗ്രി പ്രവേശനത്തില്‍ തങ്ങള്‍ക്ക് കൂടി അവസരം ലഭിക്കുന്ന തരത്തില്‍ ഫലപ്രഖ്യാപനം ഉണ്ടാകണമെന്നായിരുന്നു വിദ്യാര്‍ഥികളുടെ ആവശ്യം.ഒന്നാംവര്‍ഷ ഡിഗ്രി പ്രവേശനം പൂര്‍ത്തിയാക്കേണ്ടത് ഒക്ടോബര്‍ 31നാണ്. എന്നാല്‍ ഒഴിവുള്ള സീറ്റുകളില്‍ നവംബര്‍ 30 വരെ പ്രവേശനം നടത്താന്‍ അനുമതി ഉണ്ടായിരിക്കും. അതിനാല്‍ തന്നെ കമ്പാര്‍ട്മെന്‍റ് പരീക്ഷയിലൂടെ വിജയിക്കുന്നവര്‍ക്കും ഈ വര്‍ഷം തന്നെ ഡിഗ്രി പ്രവേശനത്തിന് അപേക്ഷിക്കാന്‍ കഴിയുമെന്നും സി ബി എസ് സി കോടതിയെ അറിയിച്ചു.