കുറ്റിപ്പുറം: കൊറോണ വ്യാപനം ചെറുക്കാൻ ലോക് ഡൗൺപ്രഖ്യാപിച്ച സാഹചര്യത്തിൽ വീട്ടിലിരുന്നു തന്നെ കുട്ടികൾക്ക് യോഗ പരിശീലിക്കാനും യോഗ അനുബന്ധ പാഠ്യ വിഷയങ്ങളിൽ സംവദിക്കാനുമുള്ള അവസരമൊരുക്കി ശ്രീ ദുർഗ്ഗാ വിദ്യാനികേതൻ ഇംഗ്ലീഷ് മീഡിയം സ്ക്കൂൾ. ഓരോ ദിവസവും യോഗ അധ്യാപിക പ്രത്യേക യോഗാസനങ്ങൾ നിർദ്ദേശിക്കുകയും അവ തലേദിവസം തന്നെ രക്ഷിതാക്കളെ അറിയിക്കുകയും ചെയ്യുന്നു. പിറ്റേ ദിവസം രാവിലെ കുട്ടികൾ യോഗ ചെയ്തശേഷം അതിന്റെ ചിത്രങ്ങൾ സ്കൂളിന്റെ വാട്സ്ആപ്പ് ഗ്രൂപ്പിൽ പോസ്റ്റ് ചെയ്യുകയാണ് രീതി.
ഇതിൽനിന്ന് ക്ലാസ് അടിസ്ഥാനത്തിൽ ദിവസവും ഒരോ വിജയിയെ തിരഞ്ഞെടുക്കുന്നു. ചലഞ്ച് അവസാനിക്കുന്ന ദിവസം ഒരു മെഗാ വിജയെ തിരഞ്ഞെടുക്കും. യോഗ അധ്യാപിക ശ്രീമതി ഷീന നേതൃത്വം നൽകുന്ന ഈ പരിപാടിയിൽ മുഴുവൻ രക്ഷിതാക്കളുടെയും സഹകരണം ഉണ്ടെന്നുള്ളത് ശ്രദ്ധേയമാണ്.
യോഗയ്ക്ക് പുറമേ കുട്ടികൾക്ക് എല്ലാ വിഷയങ്ങളിലേയും പത്ത് ചോദ്യങ്ങൾ അടങ്ങുന്ന ചെറു പരീക്ഷകളും നടത്തുന്നുണ്ട്.