തിരുവനന്തപുരം:കേരളീയ വാദ്യപാരമ്പര്യത്തെക്കുറിച്ചുള്ള സമഗ്ര വിവരങ്ങളുമായി ‘തക്കിട്ട’ ചരിത്രഗ്രന്ഥം പ്രസിദ്ധീകരണത്തിന് ഒരുങ്ങി. വിദ്യാർത്ഥികൾക്കും ഗവേഷകർക്കും ഉപകാരപ്പെടുന്ന രീതിയിലുള്ള കേരളീയ വാദ്യകലയുടെ സമ്പൂർണ്ണ ഗ്രന്ഥമാണ് 3 പുസ്തകങ്ങളായി ‘ത’ ‘കി’ ‘ട്ട’ എന്ന പേരിൽ പുറത്തിറങ്ങുന്നത്. മലപ്പുറം കണ്ടനകം ആസ്ഥാനമായി പ്രവർത്തിക്കുന്ന സോപാനം സ്കൂൾ ഓഫ് പഞ്ചവാദ്യമാണ് പുസ്തകത്തിന് പിന്നിൽ. മട്ടന്നൂർ ശങ്കരൻകുട്ടി മാരാർ അടക്കമുള്ള പഗത്ഭരുടെ മേൽനോട്ടത്തിലാണ് പുസ്തകം തയ്യാറാക്കിയിരിക്കുന്നത്.
ഷഡ്കാല ഗോവിന്ദന്മാരാരുടെ കാലഘട്ടംമുതൽ ഇന്നത്തെ തലമുറയിലുള്ള പതിനായിരത്തിലധികം വാദ്യകലാകാരന്മാരുടെ വിവരങ്ങൾ ഈ ഗ്രന്ഥങ്ങളിൽ ഉണ്ട്. കേരളത്തിലെ പ്രശസ്തരായ പതിനഞ്ചോളം ചരിത്രകാരന്മാരുടെയും പ്രഗത്ഭരായ വാദ്യകലാകാരന്മാരുടെയും ലേഖനങ്ങളും കഥകളി, പഞ്ചവാദ്യം, തായമ്പക, മേളങ്ങൾ, കേളി, പാണി, കലശക്കൊട്ട്, സന്ധ്യവേല, കൊമ്പ്പറ്റ്,
കുഴൽപറ്റ് ഉൾപ്പെടെ വിവിധ അവതരണങ്ങളെ കുറിച്ചുള്ള വിവരങ്ങളും ഉൾക്കൊള്ളിച്ചിരിക്കുന്നു.
സാമവേദം, നാട്യശാസ്ത്രം, ചുമർചിത്രകല, ദാരുശില്പം, ഫോക്ക്ലോർ, ഗുരുമുഖത്തുനിന്നറിഞ്ഞ വായ്മൊഴികൾ ഉൾപ്പെടെയുള്ള വിശദാംശങ്ങളും
ചെണ്ട, തിമില, മദ്ദളം, ഇടയ്ക്ക, കൊമ്പി, കുറുംകുഴൽ, ഇലത്താളം ഉൾപ്പെടെയുള്ള ഉപകരണങ്ങളുടെ
ചരിത്രവും നിർമ്മാണ രീതികളും പുസ്തകത്തിൽ ഉണ്ട്. കാസർകോഡ് മുതൽ തിരുവനന്തപുരം വരെയുള്ള പ്രധാന ക്ഷേത്രങ്ങളിലെ വാദ്യപാരമ്പര്യത്തിന്റെ വിവരങ്ങൾ അടക്കം ഉൾപ്പെടുത്തിയ ഗ്രന്ഥത്തിന് മൂന്ന് വാള്യങ്ങളിലുമായി 2000ത്തോളം പേജുകൾ ഉണ്ട്. 4000രൂപ മുഖവിലയുള്ള ഈ 3 പുസ്തകങ്ങൾ പ്രീ പബ്ലിക്കേഷനിൽ 2800 രൂപക്ക് ലഭിക്കുമെന്ന് സോപാനം സ്കൂൾ ഓഫ് പഞ്ചവാദ്യം ഡയറക്ടർ സന്തോഷ് ആലംങ്കോട് പറഞ്ഞു.
