സ്കൂൾ കായികമേളയുടെ മൂന്നാംദിനത്തിലും പാലക്കാട് ഒന്നാമത്: രണ്ടാം സ്ഥാനത്ത് മലപ്പുറം

SUBSCRIBE OUR YOUTUBE CHANNEL  https://youtube.com/c/SchoolVartha
JOIN OUR WHATSAPP GROUP  https://chat.whatsapp.com/DJyDol6Ntu898w1sWLREHb

തിരുവനന്തപുരം:സംസ്ഥാന സ്കൂൾ കായികോത്സവത്തിന്റെ മൂന്നാം ദിനത്തിലും പാലക്കാട്‌ ജില്ല മുന്നിൽ. 74 ഇനങ്ങൾ പൂർത്തിയായപ്പോൾ പാലക്കാട്‌ 24 സ്വർണവും, 17 വെള്ളിയും 16 വെങ്കലവും നേടി 206 പോയിന്റോടെയാണ് മുന്നേറുന്നത്. ഇന്നലെ മൂന്നാം സ്ഥാനത്ത് ഉണ്ടായിരുന്ന മലപ്പുറം ജില്ല എറണാകുളം ജില്ലയെ പിന്തള്ളി രണ്ടാം സ്ഥാനത്തെത്തി. ഇന്ന് മത്സരങ്ങൾ അവസാനിക്കുമ്പോൾ 10 സ്വർണവും 12വെള്ളിയും 10 വെങ്കലവും അടക്കം 110 പോയിന്റ് മലപ്പുറം നേടി. കോഴിക്കോട് ജില്ലയാണ് മൂന്നാം സ്ഥാനത്ത്. 5 സ്വർണവും 10 വെള്ളിയും 12 വെങ്കലവും നേടിയാണ് 73 പോയിന്റോടെ എറണാകുളത്തെ പിന്തള്ളി കോഴിക്കോട് മൂന്നാം സ്ഥാനത്ത് എത്തിയത്. മലപ്പുറം ജില്ലയിലെ തവനൂർ കടകശ്ശേരി ഐഡിയൽ ഇംഗ്ലീഷ് സ്കൂളാണ് മൂന്നാം ദിനത്തിലും മികച്ച മുന്നേറ്റം കാഴ്ച വയ്ക്കുന്ന സ്കൂൾ. 7 സ്വർണവും 5 വെള്ളിയും 3 വെങ്കലവും നേടിയാണ് മൂന്നാം ദിനമത്സരങ്ങൾ പൂർത്തിയായപ്പോൾ 53 പോയിന്റോടെ ഐഡിയൽ സ്കൂൾ സംസ്ഥാനത്ത് മുന്നേറി നിൽക്കുന്നത്.

പാലക്കാട്‌ കുമരംപുത്തൂർ കെഎച്ച്എസ് ആണ് രണ്ടാം സ്ഥാനത്ത്. 2 സ്വർണവും 5 വെള്ളിയും 6 വെങ്കലവുമാണ് കുമരംപുത്തൂർ കെഎച്ച്എസ് നേടിയത്. നാളെ രാവിലെ 7മുതൽ മത്സരങ്ങൾ പുനരാരംഭിക്കും.
തിരുവനന്തപുരം ചന്ദ്രശേഖരൻ നായർ സ്റ്റേഡിയം, യൂണിവേഴ്സിറ്റി സ്റ്റേഡിയം എന്നിവിടങ്ങളിലാണ് നാലു ദിവസം നീളുന്ന 64-ാം സ്കൂൾ കായികമേള നടക്കുന്നത്.
14 ജില്ലകളിൽ നിന്നായി 2737 താരങ്ങളാണ് മത്സരിക്കുന്നത്. 6 വിഭാഗങ്ങളിലായി 98 ഇനങ്ങളിലാ മത്സരം. കായികമേളയ്ക്ക് നാളെ കൊടിയിറങ്ങും.