സംസ്ഥാന സ്കൂൾ കായികമേളയിൽ പാലക്കാടിന്റെ മുന്നേറ്റം തുടരുന്നു: രണ്ടാം സ്ഥാനത്ത് എറണാകുളം

SUBSCRIBE OUR YOUTUBE CHANNEL  https://youtube.com/c/SchoolVartha
JOIN OUR WHATSAPP GROUP  https://chat.whatsapp.com/DJyDol6Ntu898w1sWLREHb

തിരുവനന്തപുരം:സംസ്ഥാന സ്കൂൾ കായികോത്സവത്തിന്റെ രണ്ടാം ദിനത്തിലും പാലക്കാട്‌ ജില്ല മുന്നിൽ. 45 ഇനങ്ങൾ പൂർത്തിയായപ്പോൾ പാലക്കാട്‌ 13 സ്വർണവും, 12 വെള്ളിയും 8 വെങ്കലവും നേടി 109 പോയിന്റോടെയാണ് മുന്നേറുന്നത്. രണ്ടാം സ്ഥാനത്തുള്ള എറണാകുളം ജില്ല 7 സ്വർണവും 5വെള്ളിയും 4 വെങ്കലവും അടക്കം 54 പോയിന്റ് നേടി. മലപ്പുറമാണ് മൂന്നാം സ്ഥാനത്ത്. 5 സ്വർണവും 5 വെള്ളിയും 5 വെങ്കലവും നേടിയാണ് 45 പോയിന്റോടെ മലപ്പുറം കോട്ടയത്തെ പിന്തള്ളി മൂന്നാം സ്ഥാനത്ത് എത്തിയത്. മലപ്പുറം ജില്ലയിലെ തവനൂർ കടകശ്ശേരി ഐഡിയൽ ഇംഗ്ലീഷ് സ്കൂളാണ് രണ്ടാം ദിനത്തിൽ മികച്ച മുന്നേറ്റം കാഴ്ച വയ്ക്കുന്ന സ്കൂൾ. 5 സ്വർണവും 3 വെള്ളിയും 3 വെങ്കലവും നേടിയാണ് രണ്ടാം ദിനമത്സരങ്ങൾ പൂർത്തിയായപ്പോൾ 37 പോയിന്റോടെ ഐഡിയൽ സ്കൂൾ സംസ്ഥാനത്ത് മുന്നേറി നിൽക്കുന്നത്.

എറണാകുളം ജില്ലയിലെ കോതമംഗലത്തുള്ള മാർ ബേസിൽ ഹയർ സെക്കൻഡറി സ്കൂൾ ആണ് രണ്ടാം സ്ഥാനത്തുള്ള സ്കൂൾ. 4 സ്വർണവും 3 വെള്ളിയും ഒരുവെങ്കലവുമാണ് മാർ ബേസിൽ നേടിയത്. നാളെ രാവിലെ 7മുതൽ മത്സരങ്ങൾ പുനരാരംഭിക്കും. തിരുവനന്തപുരം ചന്ദ്രശേഖരൻ നായർ സ്റ്റേഡിയം, യൂണിവേഴ്സിറ്റി സ്റ്റേഡിയം എന്നിവിടങ്ങളിലാണ് നാലു ദിവസം നീളുന്ന 64-ാം സ്കൂൾ കായികമേള നടക്കുന്നത്.
14 ജില്ലകളിൽ നിന്നായി 2737 താരങ്ങളാണ് മത്സരിക്കുന്നത്. 98 ഇനങ്ങളിലാണ് മത്സരം. ഇതിൽ 45 ഇതുവരെ പൂർത്തിയായി.