സെക്രട്ടേറിയറ്റിനു മുന്നിൽ ഉദ്യോഗാർത്ഥികൾ മുടിമുറിച്ച് പ്രതിഷേധിച്ചു

തിരുവനന്തപുരം: പി.എസ്.സി റാങ്ക് പട്ടികയുടെ കാലാവധി നീട്ടി നൽകില്ലെന്ന് വീണ്ടും സർക്കാർ പ്രഖ്യാപിച്ചതോടെ ഉദ്യോഗാർത്ഥികൾ സെക്രട്ടറിയേറ്റിനു മുന്നിൽ മുടിമുറിച്ച് പ്രതിഷേധിച്ചു. സെക്രട്ടേറിയറ്റിനു മുന്നിലെ സമരപ്പന്തലിലാണ് വനിത ഉദ്യോഗാർഥികൾ മുടിമുറിച്ച് പ്രതിഷേധം അറിയിച്ചത്.

പി.എസ്.സി റാങ്ക് ഹോൾഡേഴ്സ് അസോസിയേഷൻ പ്രതിനിധികൾ ആണ് പ്രതിഷേധമുയർത്തിയത്. റാങ്ക് പട്ടികയുടെ കാലാവധി നീട്ടില്ലെന്ന് മുഖ്യമന്ത്രി നിയമസഭയിൽ അറിയിച്ചതിന് തൊട്ടു പിന്നാലെയായിരുന്നു പ്രതിഷേധം. പി.എസ്.സി റാങ്ക് പട്ടികയുടെ കാലാവധി നീട്ടിനൽകണമെന്നാവശ്യപ്പെട്ട് റാങ്ക് ഹോൾഡേഴ്സ് സെക്രട്ടറിയേറ്റിനു മുന്നിൽ തുടർച്ചയായി സമരം നടത്തി വരികയാണ്.

റാങ്ക് പട്ടിക നീട്ടി നൽകുന്നതിൽ സർക്കാർ നടപടി ഉണ്ടാകില്ലെന്ന് ഇന്ന് മുഖ്യമന്ത്രി അറിയിച്ചതോടെയാണ് സ്വന്തം മുടി മുറിച്ച് ഉദ്യോഗാർഥികൾ പ്രതിഷേധിച്ചത്.