അന്തർകലാലയ അത്‌ലറ്റിക്‌സ് മാരത്തണില്‍ നബീലും ഷെജിനയും ജേതാക്കള്‍

തേഞ്ഞിപ്പലം: കാലിക്കറ്റ് സര്‍വകലാശാലാ അന്തർകലാലയ അത്‌ലറ്റിക്‌സ് ചാമ്പ്യന്‍ഷിപ്പിലെ ഹാഫ്മാരത്തണില്‍ ഇരിങ്ങാലക്കുട ക്രൈസ്റ്റ് കോളജിലെ എം.പി. നബീല്‍ ഷാഹി പുരുഷ വിഭാഗത്തിലും കൊടകര സഹൃദയ കോളജിലെ ഷെജിന അശോക് വനിതാ വിഭാഗത്തിലും ചാമ്പ്യന്മാരായി. കെ. അജിത്ത് സെന്റ് തോമസ് കോളേജ്, തൃശ്ശൂര്‍), വി. മുഹമ്മദ് അര്‍ബാര്‍ (ഗവ. ഫിസിക്കല്‍ എജ്യുക്കേഷന്‍ കോളേജ്, കോഴിക്കോട്) എന്നിവരാണ് പുരുഷവിഭാഗത്തില്‍ രണ്ടും മൂന്നും സ്ഥാനക്കാര്‍.

വനിതാ വിഭാഗത്തില്‍ പാലക്കാട് മേഴ്‌സി കോളേജിലെ വി. രഞ്ജിത രണ്ടാം സ്ഥാനം നേടി. 15 കോളേജുകളില്‍ നിന്നായി 22 താരങ്ങളാണ് മാരത്തണില്‍ പങ്കെടുത്തത്. സര്‍വകലാശാലാ വൈസ് ചാന്‍സലര്‍ ഡോ. എം.കെ. ജയരാജ് ഫ്‌ളാഗ് ഓഫ് ചെയ്തു. 26 മുതല്‍ 28 വരെ തീയതികളില്‍ അന്തർകലാലയ അത്‌ലറ്റിക്‌സ് ട്രയല്‍സ് കോവിഡ് മാനദണ്ഡങ്ങള്‍ പാലിച്ചു നടത്തുമെന്ന് കായികവകുപ്പ് മേധാവി ഡോ. വി.പി. സക്കീര്‍ ഹുസൈന്‍ അറിയിച്ചു.