തിരുവനന്തപുരം: പുതിയ അധ്യയന വർഷത്തേക്കുള്ള പാഠപുസ്തകങ്ങളുടെ വിതരണം തുടങ്ങി. വിദ്യാർത്ഥികൾക്കാവശ്യമായ 2.81 കോടി പുസ്തകങ്ങൾ സംസ്ഥാനത്തെ 3293 സ്കൂൾ സൊസൈറ്റികൾ വഴിയാണ് വിതരണം ചെയ്യുന്നത്. ഇതിൽ ഒന്ന് മുതൽ 7 വരെയുള്ള ക്ലാസുകളിലെ പുസ്തകങ്ങൾ സൊസൈറ്റികൾക്കു വിതരണം ചെയ്തു തുടങ്ങി. മലപ്പുറം, തിരുവനന്തപുരം ജില്ലകളിൽ വിതരണം പൂർത്തിയായ സൊസൈറ്റികളിൽ നിന്ന് അതത് സ്കൂളുകൾ പുസ്തകങ്ങൾ ഏറ്റുവാങ്ങണം. ഇതിനുള്ള നിർദേശം പൊതുവിദ്യാഭ്യാസ ഡയറക്ടർ നൽകിയിട്ടുണ്ട്. പാഠപുസ്തകങ്ങൾ കൈപ്പറ്റിയ സ്കൂളുകളിലെ പ്രധാന അധ്യാപകർ വിദ്യാർത്ഥികൾക്ക് രക്ഷിതാക്കൾ വഴി പുസ്തകങ്ങൾ കൈമാറണം. ഇതനുസരിച്ച് പുസ്തകങ്ങൾ കൈപ്പറ്റാനുള്ള നിർദേശം രക്ഷിതാക്കൾക്ക് കൈമാറണം. നിലവിലെ സാഹചര്യത്തിൽ പുസ്തകങ്ങൾ കൈപ്പറ്റാൻ രക്ഷിതാക്കൾക്ക് ബുദ്ധിമുട്ട് ഉണ്ടെങ്കിൽ അത്തരം വിദ്യാർത്ഥികളുടെ വീടുകളിൽ പുസ്തകങ്ങൾ എത്തിച്ചു നൽകാനുള്ള നടപടിയും വിദ്യാഭ്യാസ വകുപ്പ് സ്വീകരിക്കും. ഇതുവരെ 11 ലക്ഷം പാഠപുസ്തകങ്ങൾ സ്കൂൾ സൊസൈറ്റികളിൽ എത്തിച്ചു കഴിഞ്ഞതായി പൊതുവിദ്യാഭ്യാസ ഡയറക്ടർ അറിയിച്ചു.