തിരുവനന്തപുരം ലോക് ഡൗണിനെ തുടർന്ന് മാറ്റിവച്ച എസ്എസ്എൽസി, ഹയർസെക്കൻഡറി, വൊക്കേഷണൽ ഹയർസെക്കൻഡറി പരീക്ഷകൾ മെയ് 21 മുതൽ 29 വരെ നടത്താൻ തീരുമാനം. ഇതുമായി ബന്ധപ്പെട്ട് പൊതു വിദ്യാഭ്യാസ വകുപ്പ് ഉത്തരവ് പുറത്തിറക്കി. ഇതുവരെ പൂർത്തിയായ പരീക്ഷകളുടെ മൂല്യനിർണയം മെയ് 13 മുതൽ ആരംഭിക്കാനും തീരുമാനമായി. 21 മുതൽ 29 വരെ കർശന സുരക്ഷ പാലിച്ചാണ് പരീക്ഷകൾ നടത്തുക. ഇതുമായി ബന്ധപ്പെട്ട് വിവിധ വിഭാഗങ്ങൾക്ക് പൊതുവിദ്യാഭ്യാസ വകുപ്പും ആരോഗ്യവകുപ്പും നിർദേശം നൽകും പരീക്ഷകൾ ആരംഭിക്കുന്നതിനു മുമ്പായി അതത് കേന്ദ്രങ്ങൾ ശുചീകരിച്ച് അണുവിമുകതമാക്കണം. എസ്എസ്എൽസിക്ക് മൂന്നും ഹയർസെക്കൻഡറിക്ക് നാലും വൊക്കഷണൽ ഹയർ സെക്കൻഡറിക്ക് അഞ്ചും പരീക്ഷകളാണ് ശേഷിക്കുന്നത്. ഒന്നു മുതൽ എട്ടുവരെയുള്ള ക്ലാസുകളിലെ മുഴുവൻ പേർക്കും സ്ഥാനക്കയറ്റം നൽകാൻ നേരത്തെ തന്നെ തീരുമാനിച്ചിട്ടുണ്ട്. ഒമ്പതാം ക്ലാസിലെ ശേഷിക്കുന്ന പരീക്ഷ നടത്തില്ല എന്നാണ് തീരുമാനം. ഇതിനു പകരം പാദ, അർധ വാർഷിക പരീക്ഷകളുടെ മാർക്കുകൾ താരതമ്യം ചെയ്ത് വാർഷിക പരീക്ഷയ്ക്ക് മാർക്ക് അനുവദിക്കും.
