ലോക്ഡൗണിലും പുസ്തകം വീട്ടിലെത്തിച്ച്‌ ചാത്രത്തൊടി എഎംഎൽപി സ്കൂൾ
പെരുവള്ളൂർ : ലോക് ഡൗണിൽ സ്കൂൾ ലൈബ്രറി അടഞ്ഞു കിടന്നാലും കുട്ടികളുടെ വായന മുടങ്ങരുത്. വീട്ടിൽ വെറുതെ ഇരിക്കുന്ന രക്ഷിതാക്കൾക്കും വായനാ ശീലം ഉണ്ടാവണം. ലോക പുസ്തക ദിനത്തോട് അനുബന്ധിച്ച് ചാത്രത്തൊടി എഎംഎൽപി സ്കൂൾ പുതിയൊരു സംവിധാനം ഏർപ്പെടുത്തി. വാട്സ്ആപ്പ് വഴി തിരഞ്ഞെടുക്കുന്ന പുസ്തകങ്ങൾ വീട്ടിൽ എത്തിക്കും. ലോക്‌ഡൗണിൽ വീട്ടിലിരുന്നു മുഷിയുന്ന വിദ്യാർത്ഥികൾക്കും രക്ഷിതാക്കൾക്കും ഒരു പോലെ ഉപകാരപ്പെടുകയാണ് ഈ സഞ്ചരിക്കുന്ന ലൈബ്രറി. ആവശ്യക്കാർക്ക് വാട്‌സാപ്പിലൂടെ ആവശ്യമുള്ള പുസ്തകം തിരഞ്ഞെടുക്കുകയും അധ്യാപകർ വീട്ടുപടിക്കൽ പുസ്തകം എത്തിക്കുകയുമാണ് ചെയ്യുന്നത്. വായിച്ചു കഴിഞ്ഞ പുസ്തകം മാറ്റിയെടുക്കാനും സൗകര്യമുണ്ട്. ലൈബ്രറിയുടെ ആദ്യ വിതരണോദ്ഘാടനം സ്കൂൾ പിടിഎ പ്രസിഡന്റ് യുപി മുസ്തഫ നിർവഹിച്ചു.
