തിരുവനന്തപുരം: 2026-27 അധ്യയന വർഷത്തെ മാനേജ്മെന്റ് മാസ്റ്റേഴ്സ് പ്രോഗ്രാം പ്രവേശനത്തിനായുള്ള ദേശീയതല മാനേജ്മെന്റ് അഭിരുചി പരീക്ഷയായ കോമൺ മാനേജ്മെൻറ് അഡ്മിഷൻ ടെസ്റ്റിന് (C-MAT) ഇപ്പോൾ അപേക്ഷിക്കാം. നാഷണൽ ടെസ്റ്റിങ് ഏജൻസി നടത്തുന്ന സിമാറ്റ് പരീക്ഷയ്ക്ക് നവംബർ 17 വരെ അപേക്ഷിക്കാം. ഏതെങ്കിലും വിഷയത്തിൽ ബിരുദമുള്ളവർക്ക് അപേക്ഷ നൽകാം. അന്തിമ പരീക്ഷ അഭിമുഖീകരിക്കുന്നവർക്കും അപേക്ഷ നൽകാം. അപേക്ഷകർക്ക് പ്രായപരിധിയില്ല. http://cmat.nta.nic.in വഴി അപേക്ഷ നൽകാം. അപേക്ഷ നൽകാനുള്ള അവസാന തീയതി നവംബർ 17 ആണ്. ജനറൽ വിഭാഗം ആൺകുട്ടികൾക്ക് 2500 രൂപയാണ് അപേക്ഷ ഫീസ്. വനിതകൾ, ജനറൽ ഇഡബ്ല്യുഎസ്, ഒബിസി(എൻസിഎൽ), എസ്സി/എസ്ടി/പിഡബ്ല്യുഡി/ട്രാൻസ്ജൻഡർ എന്നീ വിഭാഗക്കാർക്ക് 1250 രൂപ മതി.
ഫീസ് ഓൺലൈനായി 18ന് രാത്രി 11.50 വരെ അടയ്ക്കാം. മൂന്നുമണിക്കൂർ ദൈർഘ്യമുള്ള പരീക്ഷ കംപ്യൂട്ടർ അധിഷ്ഠിത പരീക്ഷയാണ് സി മാറ്റ്.തിരുവനന്തപുരം, ആലപ്പുഴ, എറണാകുളം, കണ്ണൂർ, കോട്ടയം, തൃശ്ശൂർ, കോഴിക്കോട്, മലപ്പുറം എന്നിവിടങ്ങളിൽ പരീക്ഷാ കേന്ദ്രങ്ങൾ ഉണ്ട്. ക്വാണ്ടിറ്റേറ്റീവ് ടെക്നിക്സ് ആൻഡ് ഡേറ്റാ ഇൻറർപ്രറ്റേഷൻ, ലോജിക്കൽ റീസണിങ്, ലാംഗ്വേജ് കോംപ്രിഹൻഷൻ, ജനറൽ അവയർനസ്, ഇനവേഷൻ ആൻഡ് ഓൺട്രപ്രനേർഷിപ്പ് എന്നീ വിഷയങ്ങളിൽനിന്നും 20 വീതം ഒബ്ജക്ടീവ് ടൈപ്പ് – മൾട്ടിപ്പിൾ ചോയ്സ് ചോദ്യങ്ങൾ ഉണ്ടാകും. ശരിയുത്തരത്തിന് നാല് മാർക്ക്. ഉത്തരം തെറ്റിയാൽ ഒരു മാർക്കുവീതം നഷ്ടമാകും.
