നാലുവർഷ ബിരുദ കോഴ്സുകളുടെ ആദ്യ പരീക്ഷ: വിദ്യാർത്ഥികൾ ആശങ്കയിൽ

 

തിരുവനന്തപുരം:കേരളത്തിൽ നാലുവര്‍ഷ ബിരുദ കോഴ്സിന്റെ ഒന്നാം സെമസ്റ്റര്‍ പരീക്ഷകൾ അടുത്തെത്തിയത്തോടെ വിദ്യാർത്ഥികൾ ആശങ്കയിൽ. പഠനത്തിന് ആവശ്യമായ അധ്യയന ദിവസങ്ങള്‍ കിട്ടിയിട്ടില്ലെന്നാണ് വിദ്യാർത്ഥികൾ ചൂണ്ടിക്കാട്ടുന്നത്. പൊതുഅവധികൾക്ക് പുറമെ, ഓണം അവധി, മഴ അവധികൾ, അധ്യാപകരുടെ മൂല്യനിർണയക്യാമ്പ് തുടങ്ങി വിവിധ കാരണങ്ങളാൽ അധ്യയന ദിവസങ്ങൾ നഷ്ടപ്പെട്ടു. ആദ്യ സെമസ്റ്ററിന് 75 അധ്യയന ദിവസങ്ങൾ വേണം. എന്നാൽ ഇതുണ്ടായിട്ടില്ല. വൈകി പ്രവേശനം നേടിയ കുട്ടികൾക്ക് മറ്റു കുട്ടികൾക്ക് ഒപ്പം എത്താൻ കഴിഞ്ഞിട്ടില്ല. പല വിഷയങ്ങളുടെയും പാഠപുസ്തകങ്ങൾ കഴിഞ്ഞ ദിവസങ്ങളിൽ മാത്രമാണ് എത്തിയത്. സയൻസ് വിഷയങ്ങളിൽ എഴുത്തുപരീക്ഷയ്ക്ക് മുന്നോടിയായാണ് പ്രാക്‌ടിക്കൽ പരീക്ഷ നടത്തേണ്ടത്. എന്നാൽ, ലാബ് പ്രവർത്തനങ്ങൾ പൂർണതോതിൽ ആയിട്ടില്ല. പഠന പ്രവർത്തനങ്ങൾ നൽകുന്നതിനുപോലും മതിയായ സമയം കിട്ടിയിട്ടില്ല. പല കോഴ്സുകളിലെയും കുട്ടികളെ പരിചയപ്പെട്ടുവരുന്നേയുള്ളൂവെന്നും അധ്യാപകർ പറയുന്നുണ്ട്. നവംബര്‍ രണ്ടാംവാരത്തോടെയാണ് കേരളത്തിലെ വിവിധ സര്‍വകലാശാലകള്‍ നാലുവർഷ ബിരുദ കോഴ്സിന്‍റെ ആദ്യ സെമസ്റ്റർ പരീക്ഷകൾ നടത്താന്‍ നിശ്ചയിച്ചിട്ടുള്ളത്.