ഉദ്യോഗാർഥികളെ വെട്ടിലാക്കി സി-ടെറ്റ്, സെറ്റ് പരീക്ഷകൾ: തീയതി മാറ്റണം എന്ന് ആവശ്യം

 

തിരുവനന്തപുരം:അധ്യാപക നിയമനത്തിനുള്ള യോഗ്യതാ പരീക്ഷകളായ സി-ടെറ്റ്, സെറ്റ് എന്നിവ ഒരേ ദിവസം നടത്തുന്നത് ഒഴിവാക്കണം എന്ന ആവശ്യവുമായി ഉദ്യോഗാർഥികൾ. ജനുവരി 21നാണ് ഈ രണ്ട് പരീക്ഷകളും നടക്കുന്നത്. രണ്ട് പരീക്ഷകളും എഴുതാൻ കാത്തിരിക്കുന്നവർക്കാണ് ഒരേ തീയതി തിരിച്ചടിയായത്. പിജിയും ബിഎഡുമാണ് സെറ്റിനുള്ള യോഗ്യത. എന്നാൽ, സെറ്റ് അപേക്ഷകരിലേറെയും ബിഎ ഡിനൊപ്പം ബിരുദം യോഗ്യത യായുള്ള സി-ടെറ്റിനും തയാറെടുപ്പുകൾ നടത്തിയിട്ടുണ്ട്. ദേശീയ തലത്തിൽ നടത്തുന്ന സി-ടെറ്റ് പരീക്ഷ മാറ്റാൻ സാധ്യതയില്ലാത്തതിനാൽ സെറ്റ് പരീക്ഷ മറ്റൊരു ദിവസത്തേക്ക് മാറ്റണമെന്നാണ് ആവശ്യം.
കേന്ദ്ര സർക്കാരിന് കീഴിലുള്ള സ്കൂളുകളിൽ അധ്യാപക നിയമനത്തിനായി നടത്തുന്ന യോഗ്യതാ പരീക്ഷയാണ് സി-ടെറ്റ്. കേരത്തിലെ ഹയർസെക്കൻഡറി അധ്യാപക യോഗ്യതയ്ക്കായി സംസ്‌ഥാന സർക്കാർ നടത്തുന്ന പരീക്ഷയാണ് സെറ്റ്. രണ്ടു പരീക്ഷകളും എഴുതാൻ കാത്തിരുന്നവർക്ക് ഏതെങ്കിലും ഒന്നേ എഴുതാനാകൂ എന്ന അവസ്ഥയാണ് ഇപ്പോൾ. സെറ്റ് പരീക്ഷയ്ക്ക് ഒരു ജില്ലയിൽത്തന്നെ വിവിധ കേന്ദ്രങ്ങൾ ഉണ്ട്. സി-ടെറ്റിന് എറണാകുളം, കോഴിക്കോട്, തിരുവനന്തപുരം എന്നിവിടങ്ങളിലാണ് പരീക്ഷാകേന്ദ്രങ്ങൾ.