ബിടെക് ഒന്നാം വർഷ ക്ലാസുകൾ നവംബർ 30മുതൽ

ന്യൂഡൽഹി: ഒന്നാം വർഷ ബിടെക് ക്ലാസുകൾ നവംബർ 30ന് ആരംഭിക്കും. പുതിയ അധ്യയന വർഷത്തിലെ അക്കാദമിക് കലണ്ടർ എഐസിടിഇ പുറത്തിറക്കി.
ഈമാസം 25നുക്ലാസ് തുടങ്ങുമെന്നായിരുന്നു നേരത്തെയുള്ള അറിയിപ്പ്. പുതുക്കിയ കലണ്ടർ പ്രകാരം പ്രവേശന നടപടികളും ഒരുമാസത്തോളം നീളും. പ്രവേശനവുമായി ബന്ധപ്പെട്ട് കൗൺസിലിങ് നവംബർ 15ന് ആരംഭിക്കും. പ്രവേശനം റദ്ദാക്കാനും ഫീസ് തിരികെ ലഭിക്കാനുമുള്ള സമയം നവംബർ
25 വരെയാണ്. രണ്ടാം വർഷ ലാറ്ററൽ എൻട്രി പ്രവേശനം ഒക്ടോബർ 30നകം പൂർത്തിയാക്കണം. ഇതിനോടകം പ്രവേശന നടപടികൾ പൂർത്തിയാക്കിയ കോളേജുകൾക്ക് പഴയ കലണ്ടർ പ്രകാരം ക്ലാസുകൾ തുടങ്ങാമെന്നും നിർദേശമുണ്ട്. പ്രവേശന നടപടികൾ ഒരുമാസം നീട്ടിയ കേരളത്തിന് തീയതി നീട്ടിനൽകിയത് ആശ്വാസകരമായി.