തിരുവനന്തപുരം: ദേശീയ വിദ്യാഭ്യാസ നയത്തിന്റെ ഭാഗമായി കോഴിക്കോട് എൻഐടി ഈ വർഷം മുതൽ പാഠ്യപദ്ധതിയിൽ വിവിധ മാറ്റങ്ങൾ നടപ്പാക്കും. ബിരുദ, ബിരുദാനന്തര ബിരുദ, പിഎച്ച്ഡി കോഴ്സുകളിലെ പരിഷ്കരിച്ച പാഠ്യപദ്ധതി ഈ അധ്യയന വർഷം നിലവിൽ വരും. സ്റ്റുഡന്റ് എക്സ്ചേഞ്ച് പ്രോഗ്രാം, ഇഷ്ട വിഷയങ്ങൾ തിരഞ്ഞടുക്കാൻ കൂടുതൽ സ്വാതന്ത്ര്യമുള്ള ചോയ്സ് ബേസ്ഡ് ക്രെഡിറ്റ് സിസ്റ്റം തുടങ്ങിയവ പുതിയ മാറ്റത്തിന്റെ ഭാഗമാകും. മൾട്ടി ഡിസിപ്ലിനറി എജ്യുക്കേഷൻ ആൻഡ് റിസർച് യൂണിവേഴ്സിറ്റിയായി എൻഐടിയെ മാറ്റുകയാണു പ്രധാന ലക്ഷ്യം.
സ്റ്റുഡന്റ് എക്സ്ചേഞ്ച് പ്രോഗ്രാം പ്രകാരം വിവിധ ഡിപ്പാർട്മെന്റുകളിലെ 9 ബിടെക് വിദ്യാർഥികൾ ഹൈദരാബാദ് ഐഐടിയിലാകും അവസാന വർഷം പഠിക്കുക. റോബട്ടിക്സ്, ആർട്ടിഫിഷ്യൽ ഇന്റലിജൻസ്, മെഷീൻ ലേണിങ്, ഡേറ്റാ സയൻസ് എന്നിവ മൈനർ വിഷയങ്ങളായി പഠിക്കാൻ അവസരമുണ്ടാകും. വിദ്യാർഥികളുടെ വ്യക്തിത്വ
വികസനത്തിനായി വിവിധ സ്ഥാപനങ്ങളുമായി സഹകരിക്കും. ലക്ഷ്മിഭായ് നാഷനൽ കോളജ് ഓഫ് ഫിസിക്കൽ എജ്യുക്കേഷൻ, ഇൻസ്റ്റിറ്റ്യൂട്ട് ഓഫ് മെന്റൽ ഹെൽത്ത് ആൻഡ് ന്യൂറോ സയൻസസ് (ഇംഹാൻസ്),
ഹാർട്ട്ഫുൾനെസ് എജ്യുക്കേഷൻ ട്രസ്റ്റ് (എച്ച്ഇടി) തുടങ്ങിയ സ്ഥാപനങ്ങളുമായാണ് കൈകോർക്കുക.
